Hari ini ada dua undangan urang saruan pangantinan, di Astambul Seberang lawan Astambul Kota. Jadi kami tulak saruan salajar tulak ke pasar. Berhubung tadi motor Pina banyak, kami singgah ke pasar dulu Hanyar tulak saruan.
Pas di pasar, Acil Nang bajual iwak di higa langganan kami rancak nukar batakun, apakah kami badansanak atau badua laki-bini. Sambil takurihing, kupadahi ja kami badua laki bini.
Biar undangan dua buting, kami saruan ke Astambul Kota aja. Soalnya kulit naik jembatan, takutan lawan bahayaan marga jembatannya baguyangan. Pas kami handak sampai, tapaimbai lawan Bu Iwas.
Pas di pangantin, kaya kebiasaan ada menu nasi sop lawan soto. Pas tabarung ada nasi samin, lajurai kami mamilih itu.
Hiburan di pangantin ada nang bananyi salawatan, ada jua nang jadi pembawa acara. Pas banar pembawa acaranya manyambut tamu, ada nang datang bakalan, bakandaraan, ada jua nang bajukung.
Kami lihati ka sabarang sungai. Bujur juaai ada nang datang bajukung. Khusus ada tali jua sampai ka subarang. Mun naik jambatan sadar tajauh pang bakuliling, nun bajukung jadi taparak.
Limbah bulik ka rumah, kami tulak pulang ke BJB gasan balanja. Limbah tu ke rumah ka Amah, tapi sidinnya kada di rumah. Jadi kami langsung Bulik.
Kamariannya mama lawan ading handak tulak ka Balangan. Sudah jua manelpon supir taksi. Sakalinya pas jam ampat, nini nya Pasa singgah bulik dari Batakan. Pasanya umpat jua. Jadilah ading wan mama umpat bagian sidin ja salajur bulik ke sana, kd jadi bataksi.
Tasisa kami aja baduaan di rumah. Itu pang kagiatan hari ini. Sadang aku manulis. Sayang kada Kawa pakai bahasa Banjar bujur. Masih tacampur-campur. Ayu ha, asal jadi ja.
Post a Comment
Post a Comment